Ana Eo Saga Kai Menga Sa Paga

Nungunange Joni Wasa

Deki ine ke ina ana kai noo bhondo ria kai nea. Ana kai holo lima esa mo dage lima rua. Ana kai ina menga sa paga wee. So kao moo to bhuku ina kai so, "Aku gha lura mbo dau mberu pau". Pau wula iwa latu nebu leja ria. Deki ema kai mbana gae tei ghale eko tana sa esa gheta wawo lobo. Deki kai ka pau. Kai kao ana ngere biasa. So kao ana, ana ina menga sa paga wee. Deki ebe ine ema kai ke nangi, ke nangi, ke nangi kobe leja bebo.

Deki so. "Mae, pai ebe ata mbeo keto". Deki pai ebe ata mbeo keto nosi so "Kai ina nena noo one kai welu kai leka kuru sia leka penga ngeta gheta wee noo jala". Deki ebe nena noo one. Welu ana ina mesa kai ngai kai menga sa paga. Deki baru sa wula wee ebe mbana tu dowa ana ina mera menga mesa kai. Deki ebe mbana nena noo one tau noo kaju au kobe leja kai ghea sere nasu ngere biasa. Sere nasu are, lolo, jawa kai.

Sawe ina kai so ngere sere nasu mbeo wau da ghale tana, Ana raja ina tei nuwa gaga molo kai ina. Saga bewa ria ngata, tebo di eo ria. Sawe ina ana raja so tei kai mo kola deo kai ina. Kai paru nai da gheta one neke ghea noki kaju nggube noo hea. Ngai kai menga sa paga wee. Gheta wawo leka tune kaju. Kai ndee hea sa wii deki kubhe. Kai neke ghale one hea, ana raja ina gae-gae iwa tei. Deki ana raja nosi so, "Kai ine neke leka emba ina".

Deki kai lambo noo leja-leja, kai paru neke ghae di iwa tei leka lae nea. Ana raja nosi so, "Aku regho wee" Deki ana raja regho dowa ina. Kai mbana nai gheta tolo kaju kai nebu roke. Too ghale mai tau ka kai wau da ghale tana. Ghea pu leka kuru sia kita ata iwa. Wau da ghale foo fai ria gaga rak,ke iju di eo mono fu di eo bewa. Kai so wau gheta tolo kaju deo leda. Deo kai iwa dowa welu. Deki so, "Aku nosi limba, aku mo rina kau moo adi fai neku"

"Aku gange neku"

"Iwa, kau mae ngange. Kau ine ema kau leka emba?"

"Aku ine ema aku latgu ghawa nua le"

Deki kai dedhe mbana da gheta ghele nua kai. Deki ebe so mbana gae tolo bu ana eo ghea di iwa dowa tei. Deki so, "Aku ngawu dhau neku latu. Aku deo bu kau di aku noo ngawu dhau neku".

"Iwa le, ngawu dhau kau dau kau pera". So , "Ina. Nebu kau welu molo-molo ina" "Welu aku ghea udu ae. Ghale leka lele eo ria ina, welu leka ghale wena kai". So, "Hoo ngala ki".

"Di kau tau no nggua kai aku eo saga menga sa paga wee. Ine neku mai ina moo gae leka emba kau". So, "Iwa apa-apa nebu ke kau mbana pera kami baru mbana tuna ngawu dhau". Deki ine ema ebe so ngere simo dowa kai ina deki kai mbana tu ngawu dhau pati da ghawa ine kai. Pati rio rasi deki mbana tu ngawa ine kai. Deki ghawa kai so, "Ina ana miu menga sa paga ina". Deki kai so, "Ina ine aku eo menga sa paga ina. Miu temu sai ke nagi aku rai dowa ina. So. "Ine kau ale kau dowa leka emba ina?".

"Aku dowa ghele noo tua neku eo naja kai raja. Miu mo simo ngawu. So. "Na wengi miu mai tu?".

"Lae. Napa kami nelu roa baru kami mai da gha miu. Ina kami lae wengi tera esa mai da gha miu". Deki mbana tu kamba, jara, wawi, lako, manu lei sawe-sawe. Tiko esa. Ngawu, doi tu pati ine ema kai. Deki ine ema kai simo tau ngere biasa. Deki tau nggua ebe tau mbale fai noo haki.I Ana ebe imu lima rua. Deki haki repa wia. Deki nebu ina eo saga boko ina too bu leka kai ana eo menga sa paga wee. *

Sambu...

Gebu Gaga

Nungunange Joni Wasa

Lei sawe du'a lo'o mbana lei sawe. Ngai nua iwa bai ria. Ebe mbana lei sawe eo rapa gata. Sawe ina mera ghea ina menga ebe ata fai imu rua, ipa rua eo ana benge. Sawe ina deki uja. Uja retu. 

Deki ipa kai nosi, "Ngelo pati aku api. Ana gha ke kai ngere ina. Ana gha so eru ke, eru ke, kau wo nasu no apa ngelo gharu". Deki kai so, "Gha ga menga lako. Ana loo kai iwa mo tau lai tu api".

"Ngelo kau rike kai sa loo nopo api gharu tengu lako aku baru goa da gha". Deki kai so, "Hoo". Lai dowa nopo api ina deki rike noo aje leka tengu lako. Kai so goa da lau deki kai tuge dowa api. Iwa kai apa-apa. Lae. Sawe ina ebe eo mai walo dowa kema so, "Ine kau na tuge api ina sai lai?".

"Aku moo sii lae deki sai lai. Aku sii ipa rike leka tengu lako noo nopo api. Deki aku goa lako aku tuge api ina". Deki ebe tawa. Ebe nge tawa-tawa uja nge ria-ria tawa raka kobe. Ebe tawa nge-nge, uja nge ria-ria. Kobe so ngere bewa molu mele tenu nua ria da gheta sa kela. Leka musu mase leka lae pu nebu ina. *

Sambu...

Ha'i Ata Mata

Nungunange Joni Wasa

ANA loo ina ke deki leja ghale ke dau pesa nake. Kai so ke dau pesa nake, deki nake iwa. Sawe ina ngai kai ke, ke, deki ata polo gaka. Ata polo so gaka deki ema kai so, "Ngelo kau gaka pati sai kai nake sa boge". 

Di iwa hibu kai so kera pati kai sa boge gere sa mbeo gere jeka ghale wewa. Hai ata mata menga tako nggango pu ghale wewa. Sawe ina kobe ghea ebe so tolo di hai ata mata. Deki ebe sa nua ina mbana tolo pu hai ata mata Ebe sa nua ina iwa roke rewo ghea nua ebe. 

Eo dua loo ebe paru lewa lei sawe. Renggi noo hote ebe paru lei sawe nua welu lewa du nebu ina paru roke ghale Hobaleke wee noo Lungga Kaja da ghele gheta. Du raka leja me ina. Ebe roke ama kobe ina.

Wi sia so ngere deki nelu kai so leja ghale di renggi jeju rao. Hai ata mata du raka nua lima rua. Paru raka ghale Jopu, raka Tenda, Wolopau da ghale rembu apo pau. Deki ghale Kelinabe poghea Kelibara da lau wawo. Teirapa ndawi bu ghea ina di i kai ina iwa repa ndawi. Kai eo mesa ledhe kai noo Kelibara. Ebe paru nai da gheta ghele keli. Deki ghele keli menga ebe eo ata bupu dua imu rua. Ata fai noo ata haki. One ebe sa mboko wee.

Deki ata dua ghea ale, "Bega miu tau da emba?

"Bega kami tau hai ata mata". Ata dua ghea nosi so, "Bega miu duu sai. Duu sai leka ina. Kobe ina miu roke leka ina". Deki ebe kobe ina roke ghea ina. Deki ebe roke limba leka ghe ina. Deki ebe roke leka ghea ina ebe sa nua ata fai, ata haki, dua, loo. 

Deki kai ata haki ina deo dowa wawi sa eko. Deki rore tunu geto nasu deki poro noo hai ata mata sa boge mo gewu leka nake wawi. Deki hai ata mata ghea ina bopa du bu leda kai ina.

Deki hai ata mata so bopa mbale lewa tiwu ae.. Ae di bubu gheta wawo wolo, gheta wawo keli. Jadi me tiwu. Deki ebe mera raka ebe ata dua ghea mata. Ata dua so ngere mata sawe dowa deki ebe ndua da ghawa nua Koarada. Leka Ngalupolo, Wolotopo da gheta wawo. Ebe mera nua ebe naja kai Koarada. Du raka kai nebu ina. Deki ebe gare noo molo-molo kai raka ke nebu ina.*

Sambu...

Puse La'e Mesu

Kaju ria kami poka welu

Welu ana gheta Lise Detu

Ame toka ome mbulu telu

Paa ana puse la'e mesu.

Bahasa Indonesia
Kayu besar telah ditebang
Titipkan anak di Lise Detu
Ayah menghutang emas segumpal
Janin di perut jadi jaminan

Karangan Jacobus Ari.

Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.

Sambu...

Rako Rewo

Kuru tuu noo ae meti

Rako rewo dowa wunu peri

Teka tu so'o seli eti

Ruru reko iwa dowa weli

Bahasa Indonesia
Air mengering dan juga rumput
Daun bambu jadi makanan
Jual diri pun ragu-ragu
Harga diri dipatok sudah tak mahal

Karangan Jacobus Ari. 

Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.

Sambu...

Jara Metu

Jara metu lau sepu detu

Gie gie mbana gae ae

Ata fai eo kaki welu

Pire jie iwa dowa ale.

Bahasa Indonesia
Kuda betina di padang sana
Meringkik-ringkik mencari air
Perempuan yang kawin sembarang
Setiap lelaki silahkan mampir

Karangan Jacobus Ari.
Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.
Sambu...

Lako noo Ana Kai Ata Fai Imu Rua

Nungunange Joni Wasa

Puu dua rai kai Bara tedo jawa. Hutu so too ka lewa jawa kai. Deki kai mbana noo nara kai Mangu. So, " Mangu, kau too laka kai aku sa loo le. Aku lau jawa-jawa hutu ka sawe na. Kau noo lako kau gharu ina na too ndore kai hutu sa loo".

"Hoo weta, Wiisia roa aku baru mbana noo lako neku da lau". Sawe ina deki rail au kobe ghea ina deki ebe ndore hutu. Ndore hutu duru raka kobe limarua. So tolo hutu iwa doa kai ka jawa, deki so, "Bara, aku walo neku roa weta.

". So, Kau walo di lako welu alu sa eko, le", So, "Hoo, kau eo bhetu ghea. Ana roa, baru bagi ana kai welu kau. Ine jai dua neku". So, "Hoo". Deki Mangu bhale walo da ghele. Lako ina ebe wesi lae deki leja limarua, deki lako kao. Lako so cao deki Nusa so, "Dhei Bara, lako iwa dowa tei. Lako kao hoi, lako kao lek` emba in ". Deki dua kai Bara nosi so, "Madhe kai, kai nuka ka roa. Kai nuka ka roa, kita baru ndu". So, "Na, hoo".

Sawe ina too wiisia buga lako nuka ka. Ebe so wesi lako ka. Ka ro sawe kai mbana susu ana kai. Nusa deki ndu dheko sama. Deki ghawa lia. Lia ghe naja kai Lia Lepi. Laia ghea kita ata lepi leta kai di ata pipi jie. Ele mbana dari wee kai din gala. Deki kai joro joru da ghele. Lako tama da ghele, kai di joru sama. Kai so mbana deki ghele di kai tei ana loo ata fai imu rua., po ana lako ina nea. Dua kai lako deki susu dowa. Ebe nggebha po ngere ina deki susu po leka dua kai lako.

Kai pati bowa luka repa ola nggubhu kai nia lambu nebu ina, kai deki too langa dowa ebe ana holo rua ina deki welu dowa ghea luka repa ina. Sa imu holo da ghe, sa imu holo da gha, katu dowa noo luka repa ina sedeka limba noo dua kai lako. Lako di kola sama dowa, Kita ata bebo se Wolotola ina. Sara ebe one noo ghawa sepu kai . One ghawa deko kai.

So rai di ana ina ke kera di iwa kai ke kera. Ebe welu limba gheta ramba bewa. Deki demi lako so ka sawe, ebe poto wee lako ina tau susu ana kai. Susu ana kais awe pati wau walo. Ebe rio remo po ngere rio remo ana loo eo rewo ina. Ebe rio remo, pati ka, pati hote raka ebe foo fai. Se Wolotola bebo tema, ata nai ghale mai die be iwa kai ke kera. Rio rasi dua ebe imu rua fai haki rio pati wee. Ebe imu rua ina iwa wau rewo da ghale tana. Ele hoga tai die be turu poke wee. Ngai ana lako nea ebe deki laramea.Noo fai kai eo tuka yema eo dua ria di noo ana imu rua mema.

Ebe ana ata fai ghe deki sembulu hiwa teraesa, ata jawa mai. Ata jawa ina nipi kobe mai nosi, tei bu ana ina imu rua nea. Ebe dau dhedhe kae kai. Deki too ebe so mai ghawa lau mai noo ngawu ebe sepeti, lambu kai sepeti. Ngawu ebe liwu pija di iwa kai kira. Ebe ina mai ghawa mai noo kowa. Ebe imu rua telu mema die o ale ata fai ina menga kais a holo wee. Dheko po noo nipi kobe mai ine tei ata fai noo molo molo kai, nia iju kai tebo weki kai lei sawe pera mema. Kai deki too menga so nipi ngere ina ghawa mai limba noo kowa ria.. So, "Miu ina mai tau apa?" So," Kmi mai ale ata fai. Lele menga kami dhiwi".

Sawe ina ebe Kepala Wolotola ghea ina pai dowa ata fai lei sawe. So, "Kita noo ana ana pati wau. Too leka eo hiwa mbulu sutu, mbulu telu, mbulu raua hiwa lima, sembulu hiwa limarua raka eo sembulu hiwa lima". Deki too pati wau.Pati wau eo hiwa mbulu sutu, ebe pango pango . So, "Iwa, iwa latu". Pati wau eo hiwa mbulu telu. Ebe pangp pango. So, Iwa, iwa latu". So, "Iwa eo kami sawe dowa. Ebe ina eo dua". Pati wau walo eo mbulu rua hiwa lima. Ebe pango pango, tolotolo. Tiko imu iwa, iwa katu. Mai ebe eo hiwa mbulu rua. Ebe pango pango, tolo tolo, iwa latu. Mai eo sembulu hiwa lima rua, iwa latu. Raka eo sembulu hiwa lima ebe pangp pangp, tolo tolo di iwa latu.

So, "Iwa tenu pu ebe eo sembulu hiwa lima ina, sawe dowa ana loo. Sawe hoi Menga ebe eo ghawa lau sepu ina eo ana iwa. Ebe eo ata fai tuka tema eo dua ria dowa, bupu dua sawe". Sawe ina so, "Iwa, latu. Lae imu rua.". So, "Na miu, Bara. Miu paga ana ata sela?" So, "Iwa kai. Kai ngete roa dua rai kai.So, "Iwa, miu mae ngete. Gha ebe tuti, na". So, "Iwa ree mata kai. Raki komo kai, ree mata kai Hote kai die o ngere ina ngere ina wee". So "Iwa, miu pere pati wau".

Ebe pati wau ghawa mai rai ghele wewa one kepala, kai ata jawa nea, naja kai ebe iwa roa nosi, kai pango. So, "Dowa bu kai ina nea. Ele kai raki rombo di dua kami baru rio rasi". Ata fai so ngere deki, dua ebe mbana taku mema ae, rio rasi memaa pu ghea ina. Noohote dua kai ina welu lewa, sore lewa noo hote ebe. Deki ebe dhedhe dowa hota ghea peti so, "Eo ina hote kai mesa ina peti rua, Utu aji kai noo utu kae kai. Deki so, "Ina kae kai noo kami, aji kai noo dua miu". Deki ebe pati dowa hote pati ebe ata fai holo rua ina. So dage kobe limaesa deki ebe walo ebe. Loo dua ata fai ata haki tu ebe lau mau.Ebe sa Wolotola ghea iwa nosi so kai ina ana lako.

Sawe ina ebe ata fai, ata haki nai da lau wawo noo ana ina. Deki ebe ambo da lau wawo rapa wia noo ebe sa nua ina. Ebe Bara, ebe Nusa nuka sawe da ngele nua. Deki lako ina dai ghawa mau, deki nai da gheta wawo wolo watu. Lako ina nira da ngawa mau kai alo mangu ngeta wawo lae bopa kai lae mua. Ebe mbana da lau bema bewa deki mangu kai eo ngeta wawo so bopa dowa baru lako ina mua. Kai mua nangi pu ana ngeta ina. Deki kowa ghea ina ngange dowa ngeta mbana. Kai tau da lau nia kowa ghea dau bhale walo. Ebe bale tau mbana walo kowa ghea duu leka lae ke ina.

Sawe ina dage deka telu sutu ebe ghea ale leka ata fai ina, "Kau mae ngete". "Miu ola renggi pau aku da lau bema bewa". Deki kai nosi so, "Aku ine neku leka lako. Eo kola pu mena ghele ina kai mua, kai nangi. Nangi pu aku eo kowa iwa tei deki kai nangi. Soo jie kita bhale walo". Deki ebe bhale walo da ghele. "Miu lae pati majo eo kai. Genea miu pati baru majo eo ebe rewo. Demi majo kai lae soo jie kita bhale walo da ghele".

"Kami too ghawa Jawa mai moo gae pu kai kau. Mesi kami iwa gae kau kami iwa mai. Kami perlu lei dema-dema. Mae, soo jie kita bhale walo da ghele". So deki, so sula ghele haki kai noo duka kai ata fai ina ana dua kai lako ina renggi do londa. Londa eo repa pija pu ina poke da gheta hubu, da gheta lena peko da gheta di langga raka du ghale wena. Deki ebe woe dowa londa ina raka tengu-tengu kai lei benu. "Ine wia sai kita dowa pu ina majo kau. Kau walo sai temu koa mua temu nangi nore. Aku maba tau gare naja kau wee nge bhondo beka kapa kau walo sai da ghele". Deki lako ina di walo ngeta. Kai tolo ebe da lau nai kowa kai nira ghele mai tolo mangu kowa ina bopa dowa deki lako ina bhale kai nuka da ghele nua.

Rai deki ghele nua Nusa tei lako ina noo londa. Deki Nusa nosi, "Hei lako gha noo londa. Londa gha bewa mbeja ina mema eo woe leka tengu kai". Deki Nusa buka dowa ina. Buka so sawe deki welu hee kai. Deki Bara nuka da da ghele nara kai Mangu. So deki ghele kai nosi so, "Mangu ina weli ana lako. Lako kau ana manusia. Ana kai ata fai mesa imu rua. Kai eo dua ata Jawa dedhe dowa da ghawa. Ina ana mbulu rua lako ina welu leka dua kau. Dua ngara kau sa wogha. Kami sa wogha du'a kau sa wogha. Kami di ana iwa, welu kai leka dua kau soo jie". Deki ebe rapa wogha.*

Sambu...

Longgo Lewa

Mete tegu bela gheta wawo bewa

Ae gha po'o pere loka lewa

Mega noo nara ata beu gheta

Nara eo we'e fonga longgo lewa.

Bahasa Indonesia

Harapkan guntur di cakrawala
Air di perian ditumpahkan
Menggoda lelaki nun jauh di sana
Pelamar yang dekat diabaikan

Karangan Jacobus Ari.
Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.
Sambu...

Saku Buli

Kili rewo kata mbana uma baba

Kema rewo lepa pusi kata beta

Ragi sura masa remo eo ata

Saku buli benga pusi sura penga.

Bahasa Indonesia

Sandang keranjang ke kebun ayah
Membangun pondok kain sobekan
Kertas kosong orang yang punya
Penuh di kantong hampa isinya

Karangan Jacobus Ari.
Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.
Sambu...

So Nara Neku

Sare manu ghele latu rowa nggae

Sare manu mena pembe noo gela

So nara neku temu kai ale

Aku gha dowa noo gedo meda.

Bahasa Indonesia

Ayam di atas ada pasangan

Ayam di sana gelang di lengan

Tak usah lagi aku dilamar, sayang

Aku sudah ada yang punya

Karangan Jacobus Ari.
Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.
Sambu...

Nara ata Ndori

Ba'i mbako Paga ba'i siro singo

Ba'i mbako Ndori ola ngaki woki

Weta ata Paga mbere siro sio

Nata ata Ndori masa pori gosi.

Bahasa Indonesia

Pahit rasanya tembakau Paga
Tembakau Ndori penyapu ingus
Manis sekali nona Paga
Lelaki Ndori badannya mulus

Karangan Jacobus Ari.
Sumber: John Gawa, Kebijakan dalam 1001 Pantun, Jakarta: Penerbit Buku Kompas, 2004, hal 177-212.

Sambu...

Kobe Pa Role

Bue leka eta tesa pesa

Kobe pa role ghawa tolo moke

Koo fai fodhe nuwa muri mbombe

Bego noo gai ghai rapa role.

Bahasa Indonesia:

Kacang panjang enak dimakan
Naik melingkar di pohon pandan
Dara genit masih remaja
Bermain cinta peluk-pelukan

Karangan Jacobus Ari.
Sumber: John Gawa, Kebijakan dalam 1001 Pantun, Jakarta:  Penerbit Buku Kompas, 2004, hal 177-212.

Sambu...